الاستاذ / حماس يا رامى بتربى اولادها على الاسلام وفى المساجد . رامى / انا يا استاذ فتحاوى . وابوى ربانى فى المساجد .
الاستاذ / اولاد الحمساوية يا رامى . بتحس انهم مسلمين بحق . رامى / طيب ليش ابن شيخكو الحمساوى حسن يوسف صار مسيحى . هيك حماس بتربى اولادها
الاستاذ / هاد قصتو غير يا رامى رامى / بس انا يا استاذ عمريش سمعت ابن واحد فتحاوى صار مسيحى
الاستاذ / مهم الفتحاوية انيل من هيك . بيقعدو مع اليهود والكفار والى بيقعد مع الكفار بيكون كافر متلهم . رامى / مهى مشعل قعد مع الامريكى كارتر .يعنى مشعل كافر . وابو العبد هنية قعد مع الكفار الى اجوا فى سفينة الحصار . يعنى ابو العبد كافر .
الاستاذ / اه بس هادول بيقتلوش شعبنا . رامى / بس حماس قعدت مع اليهود فى مستوطنة بلعين .
الاستاذ /قعدو معاهم لمصلحة الشعب رامى / مشفتش صار اشى منيح للشعب بعد ما قعدو معهم يا استاذ .
الاستاذ / اقلب عن هالسيرة . انا بدى اقلك اشى . يكفى انو حماس خلت البلد تمشى على الاسلام
رامى / كيف يا استاذ . انا شايف فى الشارع بنات بشعورهن . وكل يوم باسمع قصص سرقة وقتل . وين الاسلام الى حماس مشتو فى البلد الاستاذ / لو حماس بدها تحاسب كل وحدة مشت بشعرها . كان حاسبنا الشعب كلو
رامى / طيب مهى فتح كانت تقول هيك يا استاذ . قلتو عنها كافرة الاستاذ / لا مش علشان هيك قلنا فتح كافرة .قلنا فتح كافرة لانها قتلت شيوخ المسلمين
رامى /طيب مهى حماس قتلت الشيخ صلاح العامودى . والشيخ عبد الفتاح ابو غالى .
الاستاذ / وانت شو عرفك انو حماس قتلتهم ؟. رامى / الى عرفك انو فتح قتلت مشايخ المسلمين . عرفنى انو حماس قتلت هادول .
الاستاذ / يووه انت بدك تجننى . انا اقلك على الاقل حرام عندنا فى حماس الراجل يقعد مع حرمة غريبة وهى بشعرها . لانو الشعر عورة رامى / بس انا شفت ابو العبد هنية فى التلفزيون . قاعد مع اجنبيات بشعورهن فى بيته . الى اجوا مع سفينة الحصار . واكل معهم يا استاذ
الاستاذ / هاد سياسة يا رامى رامى / وهو الدين قال . لما تيجى السياسة . حطو الدين على جنب وحللوا الحرام .
الاستاذ /خلص يا رامى فكنا من السياسة . خلينى اقنعك بطريقة اخرى رامى /اتفضل يا استاذ
الاستاذ / بتنكر يا رامى انو غزة صارت افضل بعد الحسم وامان اكثر رامى /قصدك بعد الانقلاب يا استاذ .
الاستاذ / سميه زى ما بدك . المهم بتنكر ؟ رامى / والله يا استاذ الوضع قبل الانقلاب كان افضل .
الاستاذ / فهمنى يا رامى كيف ؟ رامى / كانت ستى تنزل على السوق معاها 100 شيكل . تحمل السوق كلو وتروح على البيت اليوم بتروح على السوق بال 100 شيكل بتجيب كيلو بطاطا وكيلو بندورة وبيخلصو ال 100 شيكل
الاستاذ / انت همك بطنك يا رامى ها ها ها ؟ رامى / لا يا استاذ . كمان ايام فتح كان كيس الشمينتو ب 20 شيكل . اليوم فى حماس حقو 250 شيكل وفش غاز . وفش كاز . وفش اشى بالسوق
الاستاذ / مهو هاد من الحصار يا رامى رامى / بس انا باعرف انو الحصار بيدخلش اشى . مش بيدخل وبتشفطو دم الشعب فى سعره .
الاستاذ / انت واحد برمك كثير وزهقتنى . رامى / وانا كمان والله زهقت يا استاذ .
الاستاذ / طيب سؤال اخير يا رامى . شو رايك بالنصر الى حققتو حماس فى الحرب رامى / اى نصر يا استاذ . روح اسال الناس الى دورها اتهدمت بيقولولك اسال الناس الى اولادها ماتت بيقولولك . اسال الاطفال الى تيتمت بيقولولك .قال نصر قال .
الاستاذ / بس يا رامى كل نصر والو ثمنو .
رامى / بس يا استاذ احنا دفعنا الثمن سلف . وين النصر ؟ الاستاذ / اليهود ما حققوش الى بدهم اياه . وهاد نصر ولا شو رايك .
رامى / الى بدهم اياه اليهود . قتل اكبر عدد من الفلسطينيين . وتدمير اكبر عدد من المقرات وفى راييى يا استاذ انهم حققوا الى بدهم اياه .
الاستاذ / بس اليهود حاربونا باسلحة اكبر من قدرتنا . ومنيح الى صمدنا . وهاد نصر . رامى / مهم اليهود كانو يقصفو مقرات فتح قبل هيك . ويستشهدو شرطة وعساكر من فتح . وكنتو تقولوا الله لا يردهم . ومكنتوش تحكو انو نصر .ولا اليهود قبل الانقلاب كانو يحاربونا بنباطيات
الاستاذ / اه يا رامى بس اليهود عملوا الحرب علشان يقضو عالصواريخ ومقضوش عليها رامى / وايام ابو عمار حاولوا يقضو عليها وما قدروش وكل يوم كان فيه قصف واجتياحات وكان ضرب الصواريخ مستمر .ومسمعناش حد بيقول نصر الا على زمن حماس يا استاذ . كنتو تقولوا عن حكومة فتح مش قادرين يصمدو .
الاستاذ / بس حكومة فتح عمرهاش صدت اليهود . رامى / فى حكومة فتح عمر اليهود ما قدروا يحققوا الى حققوه فى حكومة حماس .دمار بهبل وشهداء بالالاف
الاستاذ / انا معاك يا رامى انو فتح زمان كانت منيحة . رامى / وانا كمان معاك يا استاذ انو حماس زمان كانت منيحة .
الاستاذ / زمان حماس كانت منيحة !!!. واليوم مالها ؟ رامى / اليوم بيدوروا على الجيبات والمكاتب والكراسى . وبطل حد يقول مقاومة .
الاستاذ / لا المقاومة موجودة رامى / بس يا استاذ من يوم ما حماس مسكت غزة . ما سمعنا عن عملية استشهادية .
الاستاذ / هاد استراحة مقاتل يا رامى . انت شو فهمك . رامى / وهو مقاتل حماس لازم يرتاح ومقاتل فتح مش لازم يرتاح يا استاذ
الاستاذ / لا يا رامى . من حق اى مقاتل انو يرتاح رامى / طيب ليش لما فتح تبطل تقاوم بتقولوا عنهم همل وجبناء وتركوا المقاومة ولما حماس تبطل تقاوم . بتقولوا استراحة مقاتل .
الاستاذ / والله انا استاذ وبافهمش فى امور المقاتلين . رامى /احسن برضو يا استاذ .
الاستاذ / طيب يا رامى شو رايك فى حماس الى خطفت الجندى شاليط رامى / اشى منيح والله يا استاذ
الاستاذ / اهااااا اخيرا اقنعتك . عمر فتح خطفت جندى يا رامى رامى / اه يا استاذ . فى رام الله الشرطة اعتقلت جنديين قتلوهم ورموهم من شباك المقر
الاستاذ / اها . طيب يا رامى . قياداتنا مسجونين عند اليهود مش حبايب هم واليهود . رامى / مالك يا استاذ . مسمعتش فى قائد فتحاوى اسمو مروان البرغوثى .
الاستاذ / ولك انت معجون بمية عفاريت . رامى / لا يا استاذ . انا انسان خلقة ربنا . وحرام عليك هاد التشبيه .
الاستاذ / اسمع انت واحد قليل الادب . رامى / الله يسامحك يا استاذ .